Exo 20 | TVK | STEP | Di, Hi misa sepinien xil ak mi moletin xil bit,

Exodus 20

Hi Misa Rae He Xalu (10) mi Mol-Isrel Xil

Eksodas 20:1-21

1 Di, Hi misa sepinien xil ak mi moletin xil bit, 2 “Inou nabe Iahova, Hi namim, xa nateleh rerat xamim ra hal Isip, ut xa xamim mutehe slev xil en.

3 Munamot ti mi hi sav xil, e mumot minou kestang.

4 Munapol ni ti nanao xil xa langgur nini neta sav xil xa ladi tilang hat nesao, mu ladi e tan, mu ladi e tas. 5 Munatingeiril ti e munamot ti mi nanao tova vengan xa inou, Iahova, xa nabe Hi namim, ieok ti tavei xamim muvusil hi sav xil. Vengan xa ngan xil xa lasin nou, inou nisa pangasien mi xil, mi tuten nae xil, e mi havneli xil ha ituxoh tuten nae xil mun. 6 E mi ngan xil xa di iexil bei nou e langgusil xat rae xil navan, inou nipisen eheien navan mi xil e mi vatimol nae xil iha vuma ... liti e eheien navan vehakut tang.

7 Munahit voten hisok ti e munasepin ni ti natel nenemien xil xa misa vengan xa inou nabe Iahova, Hi namim, e nilepis moletin xil xa di labithiten hisok e sexien xa tamal ti.

8 Muhur xat Sabat e mumerere ni melengien ak vengan xa be melengien eo. 9 Melengien namim xil be tei e he sav (6) xa ti mupol ni polien namim en. 10 E melengien xa be lu e he sav (7) nen be Sabat, melengien xa inou, Iahova, Hi namim, natehosei tehe navan. E melengien ak, xamim, horamue e atuli namim xil, slev namim xil, vongoro samim xil, e ngan halesav xil mun xa ladi visal xamim, xamim vus munapol ti. 11 E melengien tei e he sav (6) iaxa inou, Iahova, natepol ni tilang hat, ut etan e tas, e natepol ni holesok xil vus xa ladi ut xatel ak. E melengien lu e he sav (7) nen, inou natengel. Ve rin ak, inou, Iahova, natetuxol xat Sabat e natelingi tehe melengien eo.

12 Mumerere ni tamemim e ninemim xil. Imak, ma meulien namim ihe teviei e tan xa inou, Iahova, Hi namim, ti nisa ni mi xamim.

13 Munahas vin ti moletin.

14 Munakan ni atou mu tiramue na mosav ti.

15 Munakan ni ti neta na mosav xil.

16 Munaluvos ni his mosav xil ti.

17 Eheien namim nati ti e nim ma mosav, mu atou nan, mu slev nan, mu buluk san, mu dongki san, mu holesok sav mun nan.”

18 Melele xa moletin xil di lalong Hi misepin mi xil nggo veta xa posou e amaru xa di misel nggeih, e lapusi di milangas e eas mikutaxol vathu, lexil mulul ve ulikanen e lasoh ladi nga sotin. 19 Xil labiteni mi Mosis labit, “Xouk kestang ti usepin mi xamem e muteong ni xouk. E Hi nasepin ti mun namal mi xamem, maxani mulel vari tang.”

20 E Mosis bit rilomun ni mi xil bit, “!Ulimim nakan ti! Hi bemei e tan tang Munamot.” 21 E moletin xil lasoh ladi nga sotin, e Mosis kestang mikakao be sangas ni momah te maluxoluk xa Hi da en.

Hi Misa Rae Sav Xil Mun mi Mol-Isrel Xil

Eksodas 21:12-17; 22:16-27; 23:1-2

E vathu nesao, Hi misepin mi Mosis e bit kil rae sav xil mun mini tengan ha ihit mesen ni mi moletin xil.